Hierdie was die derde jaarlikse Ron Roseveare nagresies en dit was ook die derde keer dat ek deel geneem het. Ek het soos gewoonlik saam met Doug op sy boot Sea Quill geseil. Hierdie jaar was ons 6 op die boot (dit sluit natuurlik Neville, Doug se 5 jarige seuntjie in).
Sea Quill bemanning
Die Ron Roseveare resies begin gewoonlik 16:30 namiddag vanaf die Weste kant van die dam en kronkel heen en weer oor die dam tot by die eindpunt by PNYC wat naby die invloei van die Wilgerivier is. Die roete is ongeveer 40 myl ver. Die resies is vernoem na ‘n lid van die PNYC wat verdrink het tydens een van die klub se uithou wedvaarte. PNYC bied die resies elke jaar aan.
20 bote het ingeskryf
Nadat Peter uiteindelik opgedaag het, het ons so gou moonltlik na die ander kant van die dam vertrek. Dit vat meer as ‘n uur om vanaf PNYC na DAC met die motor te vaar. Ons wou vroeg daar wees sodat ons lekker kon ontspan en braai voor die resies begin.
Wag alweer vir Peter
Ons het ‘n paar biere by DAC gedrink en toe gaan braai. Die weer was wonderlik, daar was wind en dit was so warm soos dit maar in Augustus raak. Na die braai het ons die resiesoorsig gaan bywoon, voordat ons na die wegspringboei gevaar het. Daar het twintig bote ingesrkyf so die wegspring area het vinnig begin besig raak. Die deelnemers was van alle grote en vorige wenners soos Baleka was soos gewoonlik ook daar.
Kevin braai te lekker terwyl Neville toekyk
Met die wegspring was ons eerste oor die lyn en was vyfde om die eerste merk (na die vier moderne bote ons verby gesteek het). Met sonsondergang het die wind gaan lê. Ek dink die hele vloot het gedink dit is die einde van die wedvaart en ‘n herhaling van laas jaar, maar skielik het die wind weer begin waai. Dit het baie gedraai en die windspoed was baie wisselvallig, maar ons was te dankbaar vir wat ons kon kry. Die wind het die res van die aand aanhou draai en sterk gewaai dan heeltemal ophou waai. Dit het beteken dat Peter en Kevin hard moes werk om seile te wissel.
Wind raak stil
Ons het net na twee uur in baie koue weer klaar gemaak. Ons was vyfde oor die eindstreep, maar het algeheel vierde geëindig volgens voorgee. Nadat ons warm sop by die Klub gaan eet het, het ek huistoe gery. Wat het ek Sondag gedoen? Geslaap!